Monday, May 12, 2014

ಬೃಹತ್...!

ರಾಜರಿಗೇ ರಾಜನಂತೆ,
ರಾಜ್ಯಗಳ ಗೆದ್ದನಂತೆ,
ಸೀಮೆಗಳ ಸೇರಿಸಿ,
ಮೇರೆಗಳ ವಿಸ್ತರಿಸಿದನಂತೆ.
ಗೆಲುವ ಕಂಡರಿಸುವ
ಹಂಬಲ ಹೊತ್ತು..
ವರುಷಗಟ್ಟಲೆ
ಸಾವಿರಶಿಲ್ಪಿಗಳ
ಉಳಿಪೆಟ್ಟಿನಲಿ
ಮೂಡಿತು
ಬೃಹದ್ದೇಗುಲ!

ಎಲ್ಲ ದೊಡ್ಡವು
ಆವರಣ, ಪ್ರಾಕಾರ
ಕಮಾನು,ಗೋಪುರ
ನಂದಿ,ಸ್ತಂಭ, ಸ್ಥಾವರ ಲಿಂಗ!
ಚೋಳಶಿಲ್ಪಕಲೆ, ಹಿರಿಯ ರಾಜನ ಖ್ಯಾತಿ!

Photo courtesy - web (southindiatemples.net)
ಕಾಲ ಹೊರಳಿತು.
ದೇಹವಳಿಯಿತು.
ಬಣಗಳ ಪಂಗಡಗಳ ಧರ್ಮಗಳ
ಯುದ್ದಕೆ ಪಕ್ಕಾದ
ಬೃಹತ್ ದೇಗುಲ
ಪೆಟ್ಟಾದರೂ ಮೀಸೆ ಮಣ್ಣಾಗದ ಹಾಗೆ
ಮುಜರಾಯಿ ಇಲಾಖೆಯ
ಕಾಯಕರ್ಮದಲಿ
ಮತ್ತಷ್ಟು ಗರಿಗೆದರಿ.

ಹಳೆಯ ಕತೆ ಹೇಳಲು:
ರಾಜರ ಕತೆ,
ಸೋತವರ ಕತೆ, ಗೆದ್ದವರ ಕತೆ
ಊರು ಬಿಟ್ಟವರ ಕತೆ,
ಬಂದು ಸೇರಿದವರ ಕತೆ,
ನೋಡಿ ಹೋಗುವವರ ಕತೆ,
ಹೋಗುವಾಗ ತಿರುಗಿ ನೋಡಿ ಹೋಗುವವರ ಕತೆ,,,,
ಹೇಳಲೆಂದೇ ಉಳಿದಿದೆ.
ಉಳಿದಿದ್ದಷ್ಟೇ ಅಲ್ಲ,
ಅಳಿದಿದ್ದೇ -
ಹೇಳುವ ಕತೆಗಳು

ಸಾಕಷ್ಟಿವೆ.

Thursday, April 24, 2014

ಕು ಹೂ ಗೀತ

ಇವಳು
"ಸ್ಥವಿರಗಿರಿಯ ಚಲನದಾಸೆ",
ಇವನು
"ಗಂಗಾವತರಣ".
ಇವಳು
ಕಲರವದ ಮರುದನಿ ಹಕ್ಕಿ.
ಇವನು
ಹಕ್ಕಿ ಕೂತ ರೆಂಬೆ.
ಇವಳು
ಬೆಳ್ಳಿ ಮೂಡಿತೋ ಕೋಳಿ ಕೂಗಿತೋ.
ಇವನು
ಎಮ್ಮೇ ನಿನಗೆ ಸಾಟಿಯಿಲ್ಲ.
ಇವಳು
ದೊಡ್ಡವರೆಲ್ಲ ಜಾಣರಲ್ಲ.
ಇವನು
ಕುಲದಲ್ಲಿ ಕೀಳ್ಯಾವುದೋ ಹುಚ್ಚಪ್ಪ.
ಇವಳು
ದಂಡೆಗೆ ಹುಲಿಮುದ್ದು
ಮಾಡಿ ಮತ್ತೆ ಮತ್ತೆ ಬರುವ
ಸಮುದ್ರೆ.
ಇವನು
ಸಮುದ್ರೆಗೆ
ಕಾದು ಕೂತ
ದಂಡೆ.
ಇವರಿಬ್ಬರ ಸಂಗಾತ
ದಲ್ಲಿ
ನಾವು
ತೆರೆಯಿಳಿತ ತೆರೆಯೇರು,
ಸಂಭ್ರಮದ ಈಜುಮುಳುಗು,
ಒಮ್ಮೊಮ್ಮೆ
ನೀರು ಕುಡಿದು ನೆತ್ತಿ ಹತ್ತಿ,
ಮತ್ತೆ ನಗುನಗುತ್ತ
ಅಳುನುಂಗಿದ

ಮೆರ್ರಿ ಗೀತ. 

ಪುತಿನ ಅಂದ ಹಾಗೆ
ಕೂ ಗೀತ. ಹೂ ಗೀತ. ಕುಹೂ ಗೀತವು.


Monday, April 21, 2014

ಸಾಂತ್ವನ

ನೀನು,
ನಿನ್ನೆ,
ಪೇಟೆಬೀದಿಯ ಮಧ್ಯೆ,
ನನ್ನ ಹರುಕುಬಟ್ಟೆಯನ್ನೂ ಕಿತ್ತೊಗೆದು
ಚಪ್ಪಲಿಯಲ್ಲಿ ಹೊಡೆದುಬಿಟ್ಟೆ.
ಒಂದು ಕಣ್ಣಿನಲ್ಲಿ ನೀರು ಸುರಿದವು-
ಅವಮಾನಕ್ಕೆ,
ಮುಚ್ಚಿಟ್ಟುಕೊಂಡಿದ್ದು
ಬಯಲಾದ ಅಸಹಾಯಕತೆಗೆ,
ಹೊದಿಸಿದ ನೀನೇ
ಕಿತ್ತೊಗೆದ ವಿಪರ್ಯಾಸಕ್ಕೆ.
ಇನ್ನೊಂದು ಕಣ್ಣಲ್ಲಿ ಹನಿಗಳೊಡೆದವು-
ಜನ ಬಂದು,
ಮೈಮುಚ್ಚಿ,
ಕಣ್ಣಲ್ಲೇ ಛೇ ಪಾಪ
ಎಂದಿದ್ದಕ್ಕೆ.

ಪಯಣವೆಂದು
ಭ್ರಮಿಸಿ
ನಿಂತಲ್ಲೇ ನಿಂತಿದ್ದಕ್ಕೆ
ಇದೇ ತಕ್ಕ ಮರ್ಯಾದೆ.

ಕೃತಜ್ಞತೆ ಕೈಕಟ್ಟುತ್ತದೆ.
ದನಿ ಮೂಡದ
ಮಾತುಗಳ
ಬಳ್ಳಿಸಾಲು
ಕಾಗದವಲ್ಲದ ಕಾಗದದಲ್ಲಿ
ಬೆಂಕಿ ಹಚ್ಚುತ್ತದೆ.
ಹೊಗೆಯಿಲ್ಲ,
ಬರಿಯ ಉರಿ ಮಾತ್ರ,
ಕಿಡಿಯೂ ಮರಳದ
ಹಾಗೆ.. ಬೂದಿ ಕೂಡ ಇಲ್ಲ,
ಒಮ್ಮೊಮ್ಮೆ

ಉರಿಯೇ ಸಾಂತ್ವನ.

Friday, April 11, 2014

ಅನುಕ್ತ

ಧುಮ್ಮಿಕ್ಕುತ್ತದೆ
ಧಾರೆ
ಹೊಮ್ಮುತ್ತದೆ
ಜ್ವಾಲೆ
ಸುಯ್ಯುತ್ತದೆ
ಅಲೆ....

ಒಡ್ಡು
ಕಟ್ಟೆ
ದಂಡೆ.. ಗಳಿಗೆ ಸುಳಿಸುಳಿದು-
ತಡೆಯುತ್ತದೆ,
ಹಿಮ್ಮೆಟ್ಟುತ್ತದೆ,
ಮರಳುತ್ತದೆ,

ತುಟಿಗಳಲ್ಲಿ
ನೇತಾಡುವ ಮಾತು..
ತಿರುಗಿ
ಬಂದ ಕಡೆಗೆ ಹೋಗುತ್ತದೆ.

ಹೇಳುವುದಕ್ಕೂ
ಕೇಳುವುದಕ್ಕೂ

ಸಮಯವಿಲ್ಲ.

Monday, April 7, 2014

ಖುಶಿ ಕದ್ದಿಟ್ಟಿದೇನೆ... ರುಚಿ ನೋಡದೆಯೇ...

ಗಾಢ ಕತ್ತಲೆಯ ಒಡಲಿಗೆ,
ಸಾಲುದೀಪದ ಬೆಳಕಿನ ಅಂಚು,
ಕತ್ತಲೆಯನ್ನೇ
ಆಪ್ತವಾಗಿಸುವ ಸಂಚು!

ಟೇಬಲ್ಲಿನ ಮೇಲೆ,
ಮೂಲೆಯಲ್ಲಿ,
ತರಿಸಿಟ್ಟ ಹೊಸ ಪುಸ್ತಕ.
ಪುಟ ಬಿಚ್ಚಿಲ್ಲ,
ಇನ್ನೂ.
ಶುರು ಮಾಡಿದರೆ,
ಮುಗಿದು ಹೋಗುವ ಭಯ.

ಈ ಜನ್ಮದಲ್ಲಿ
ಇದು ಮೊದಲ ಬಾರಿ.
ಅನಿಸಿದ್ದು ಮಾಡದೆ,
ಮುಗಿದು ಹೋಗಬಹುದು
ಎಂದು ತಡೆದಿರುವುದು...!


ಕೋಡಗನ ಕೋಳಿ ನುಂಗಿತ್ತಾ
ಎಂಬ ಶರೀಫಜ್ಜನ ಮಾತು
ಬರಿಯ ಫ್ಯಾಂಟಸಿಯಿಂದ
ನಿಜಕ್ಕೆ ಹೊರಳಿಕೊಳ್ಳುವ
ಹೊತ್ತು......
ಹೌದು ವಯಸ್ಸಾಯಿತು.
ಬಿಸಿಲಿಗೆ ಬಯ್ಯುವುದಕ್ಕೆ
ಮುಂಚೆ,
ಹೆಪ್ಪುಗಟ್ಟಿ ಮೋಡವಾಗುತ್ತಿರುವ
ಗಾಳಿಯ ಅರಿವಾಗಿ
ಸುಮ್ಮನಾಗುವ ಹೊತ್ತು.
ಮುಂದೆಂದೋ ಸುರಿಯಲಿರುವುದಕ್ಕೆ
ಇಂದಿನಿಂದಲೇ ಕಾಯುವ ಹೊತ್ತು.

Wednesday, April 2, 2014

ಕರವಸ್ತ್ರದಂತ ಕವಿತೆ!

ಹುಲ್ಲು ಮುಚ್ಚಿದ
ಹೆಜ್ಜೆ ಮೂಡದ
ಹಾದಿ.

ನೀಲಿಯಲಿ ನೆಲೆಸಿ,
ನೆತ್ತಿ ಸುಡುವವನ
ತಪ್ಪಿಸಿ,
ನೇವರಿಸಿದ
ಮರಹೊದಿಕೆಯ
ಕಡುಹಸಿರು
ನೆರಳು,

ಆರೋಹದ
ನಡುವೆ
ತಿಳಿಹಳದಿ,ಗುಲಾಬಿ
ನೀಲಿ, ಬಿಳಿ, ನೇರಳೆ
ಹೂ ಹೊದ್ದ
ಬಯಲು.

ಬೆವರಿಳಿದು
ಉರಿಯಾಗಿ
ಕಿರಿಹಿಡಿದ ಕಣ್ಣಿಗೆ
ಕಂಡ ಪಯಣದ ಸೊಗಸೇ
ಸೊಗಸು!

ಕಳೆದಿದ್ದು ಎಲ್ಲಿ
ಗಮ್ಯವೆಂದುಕೊಂಡ
ನಿಲುಗಡೆಯಲ್ಲೇ?

ಅದೇಕೋ
ಕಣ್ಣುರಿ,
ಹನಿ ಹೊರಬರದಂತೆ
ತಡೆದು.
ನೆನಪಿನ ಕರವಸ್ತ್ರಕ್ಕೆ
ಸದಾ ಕೆಲಸ,
ಒದ್ದೆಯಾದಷ್ಟೂ
ಒಣಗಿಸುತ್ತದೆ

ಬೆಂಗಳೂರಿನ ಬಿಸಿಲು.