ಗೆಜ್ಜೆ
ಕಂದರ ಪಾದದಿ ನಲಿಯುವ ಗೆಜ್ಜೆ,
ಕುಣಿಯುವ ಕಾಲಲಿ ಉಲಿಯುವ ಗೆಜ್ಜೆ,
ಎಳೆಯುವತಿಯ ಪಾದದಿ ಬಿಂಕದ ಗೆಜ್ಜೆ,
ಕಟೆದ ಶಿಲ್ಪಗಳ ಕುಸುರಿಯ ಗೆಜ್ಜೆ,
ಜಾತ್ರೆಯಲಿರುವ ಹೊಸಹೊಸ ಗೆಜ್ಜೆ.
ಸಿಂಗಾರದ ಗೆಜ್ಜೆ, ಶೃಂಗಾರದ ಗೆಜ್ಜೆ,
ಹೆಜ್ಜೆಯ ಜೊತೆಗೆ ಸಡಗರದ ಗೆಜ್ಜೆ.
ಅಜ್ಜ ಕೊಡಿಸಿದ ಗೆಜ್ಜೆ,
ಮಾವನಿಡಿಸಿದ ಗೆಜ್ಜೆ
ಅಮ್ಮ ಸಂಪಾದಿಸಿದ ಗೆಜ್ಜೆ,
ಹಬ್ಬದ ಗೆಜ್ಜೆ,
ಮದುವೆಯ ಗೆಜ್ಜೆ,
ಗೆಣೆಕಾರ ಕೊಡಿಸಿದ ಗೆಜ್ಜೆ,
ವಿಧವಿಧಗಳ ನೋಡುತ
ಮನವಿಡುವುದು ಹಳೆಹಾದಿಗೆ ಹೆಜ್ಜೆ.
ಮೊನ್ನೆ ನೋಡಿದೆನೊಂದು
ಅಪರೂಪದ ಗೆಜ್ಜೆ!
ದ್ವಿಚಕ್ರವಾಹನದಿ ಅವಡುಗಚ್ಚಿ
ನಮ್ಮ ವಾಹನದೋಟಕೆ ಸಮನಾಗಿ
ಓಡಿಸುತಿಹ ತಾಯಿಯೋರ್ವಳ ತಾಯಿಯೋರ್ವಳ
ಮರಗಾಲನು ಬಳಸಿ ಕುಳಿತಿಹ ಗೆಜ್ಜೆ!
ಸದ್ದು ಮಾಡದೆಯೂ ದನಿಯಾಗುವ ಗೆಜ್ಜೆ
ವಿಶ್ವಾಸದ ತೊರೆಗೆ ಹನಿಯಾಗುವ ಗೆಜ್ಜೆ.
ಜೀವಂತ ಕಾವ್ಯದ ಬನಿಸಾಲು ಗೆಜ್ಜೆ.
No comments:
Post a Comment