ಈ ಸಂಭಾಷಣೆ.. ಈ ಸ್ನೇಹ ಸಂಭಾಷಣೆ..

ಸೈಲೆಂಟು ಮೋಡಿನಲ್ಲೆ
ರಿಂಗಾಗುವ ಫೋನು...:
ನಿನ್ನ ಆತುರದ ನುಡಿ
ಕವಿತೆ ಕಳಿಸುತ್ತೇನೆ
ಓದು ಬೇಗ...
ಪಿಸುಗುಡುತ್ತೇನೆ ನಾನು:
ಇರಲಿ, ನಿಧಾನ,
ಇವತ್ತು ತುಂಬ ಕೆಲಸ,

ಎಲ್ಲಿ ಬಿಡುತ್ತೀಯ ನೀನು?:
ಇಲ್ಲ, ಈಗಲೇ!
ಇದು ನಿನ್ನೆ ರಾತ್ರಿಯಿಂದ ನನಗೆ
ಹಿಡಿಸಿದೆ ಹುಚ್ಚು,
ನಿನಗೂ ಒಂದಿಷ್ಟು ಒರೆಸದೆ
ಇರಲಿ ಹೇಗೆ?!
ಈ ಕೂಡಲೆ,
ಎಲ್ಲ ಬದಿಗಿಟ್ಟು
ಓದು..
ಮಧುರವೋ ಚೆನ್ನವೋ
ಆಮೇಲೆ ಹೇಳು.

ಓದು. ಓದಿ ಮರುಳಾಗು,
ಹಿಡಿಯಲಿ ಹುಚ್ಚು,
ಸಂಜೆ ಸಿಗೋಣ,
ಕಾಫಿ ಕುಡಿಯುತ್ತಾ-
ತಿರುಪು ಬಿಚ್ಚು.
ಅಮಾಸೆ ಹುಣ್ಮೆಗಳ,
ಹಂಗಿಲ್ಲದ
ಭಾವಕಡಲ ದಂಡೆಗೆ
ಬಂದೊಡ್ಡಲಿ ಭರತ.

ಹೂಂ.. ಸರಿ ಸರಿ,
ಇನ್ನು ಬಿಡುವುದಿಲ್ಲ ಈ ಮಹರಾಯಿತಿ.
ಈಗ ಶುರುವಾಗಿದೆ
ಮಾನ್ಸೂನು,
ಆಗಲೇ ಕಡಲ್ಕೊರೆತ!


:-) :-):-) :-) :-):-)
ಸರಿ, ಎಲ್ಲಿ? ಇನ್ನೂ ಬರಲಿಲ್ಲ ಕವಿತೆ?
ಹಿಡಿಯುವುದಕ್ಕೆ ಮೊದಲೆ ಹುಚ್ಚು ಕೆದರಿತೆ?!