Thursday, June 9, 2016

ಮಳೆಗಾಲ

ಇದೀಗ ಮಳೆಗಾಲ;
ಹೋದ ಸಲದ ಮಳೆ ಕಳೆದು
ಚಳಿ ಹಿಡಿದು, ಹಸಿರು ಕೆಂಪಾಗಿ
ಧನುರ್ಮಾಸದ ಚುಮುಚುಮು ಬೆಳಗಲ್ಲಿ
ಬಿಸಿ ಬಿಸಿ ಹುಗ್ಗಿಯುಂಡು
ಸಂಕ್ರಮಣದಲ್ಲಿ ಉದುರಿದ
ಎಲೆಗಳ ಕಾಂಡ ಹೊತ್ತ ಮರಗಿಡಗಳೆಲ್ಲ
ಚೈತ್ರ ಬರುವ ನಿರೀಕ್ಷೆಯಲ್ಲಿ ಚಿಗುರಿ
ವೈಶಾಖದ ಬಿಸಿಲಿನಲ್ಲಿ
ಹೂವ ಅಗ್ಗಿಷ್ಟಿಕೆಯ ದಿವ್ಯ ಗೊಂಚಲು
ಮೊದಲ ಮಳೆ ಬಿದ್ದ ಕೂಡಲೆ
ಬೇಲಿಸಾಲಿನ ಮಲ್ಲಿಗೆ ಬಳ್ಳಿ ತುಂಬ
ಅಚ್ಚ ಬಿಳಿಯ ಮಲ್ಲಿಗೆ
ಕೊಡೆ ಹಿಡಿದು, ಹೊಂಡ ಹಾರುತ್ತ
ಹೋಗುವಾಗ ಸಿಕ್ಕುವುದು
ಮಳೆ ನಿಂತ ಮೇಲಿನ ಹೂಚೆಲ್ಲಿದ ಹಾದಿ

ಇದೀಗ, ಮತ್ತೆ ಮಳೆಗಾಲ:
ಬ್ಲಾಗೂರಿನ ಮರದಲ್ಲಿ
ಮಳೆನಿಂತು ಹನಿಯುತಿದೆ.
ತೂಗಿಬೀಳುವ ಆಕಾಶಮಲ್ಲಿಗೆ
-ಯ ಮೃದುಲಘಮಕ್ಕೆ
ಚಡಪಡಿಸುವ ಮನವನ್ನ
ಸಂತೈಸುವ ಮತ್ತಿದೆ.
ಹಳೆವೈನು ಕೇಳುವವರಿಲ್ಲದೆ ಸುಮ್ಮನೆ ಕೂತಿದೆ.

1 comment:

sunaath said...

ಹಳೆ ವೈನಿಗೆ ರುಚಿ ಹೆಚ್ಚು ಎನ್ನುತ್ತಾರೆ,
ಹೊಸ ಸೀಸೆಯಲ್ಲಿ ತುಂಬಿ ಕೊಡಿ!