ಸಂಸರ್ಗ

ಸೊಟ್ಟಕೆ
ಅಂಕು ಡೊಂಕಾಗಿ
ಕೆಲಕಡೆ ದಪ್ಪಗಾಗಿ
ಮತ್ತೊಂದೆಡೆ ಹರವಾಗಿ
ಬೆಳೆದ ಬಳ್ಳಿಯಲೊಂದು
ಮೊಗ್ಗು
ಬಳ್ಳಿಗೆ ಹಸಿರು ಕಡಿಮೆ
ಸೊಂಪಿಲ್ಲ
ನೆರಳೂ ಇಲ್ಲ
ಘಮ ಕೇಳಲೇಬೇಡಿ.
ಬೇಕೋ ಬೇಡವೋ
ಎಂಬ ಹಾಗೆ.

ಇನ್ನೂಬಿರಿಯದ
ಮೊಗ್ಗು
ಇಷ್ಟು ದೂರಕ್ಕೇ
ಘಮ್ಮೆಂದು
ಎಸಳಿನ ನಾಜೂಕು
ಮ್ಯಾಕ್ರೋ ಲೆನ್ಸಿಗೆ ಗೊತ್ತು.
ಅರಳುವ ಮುನ್ನ
ಒಳಗೆ ಬಣ್ಣ
ತಿಳಿಯಾಗಿ ಹರಡಿಕೊಳ್ಳುವ ಹೊತ್ತು
ಪಕಳೆಗಳ
ಮಧ್ಯದಿ ಬಣ್ ಬಣ್ಣದ
ರೇಣು ಹೊತ್ತ ಶಲಾಕೆ
ಇದು ಈ ಬಳ್ಳಿಯದೇ ಹೂವೇ?!
ಒಣ ಬಳ್ಳಿಗೇ
ಸಂಭ್ರಮವೊಂದು ಆವರಿಸಿದ
ಹಾಗೆ.

ನಾರೂ ಸ್ವರ್ಗಕ್ಕೆ ಹೋದ ಬಗೆ
ಓದಿ ತಿಳಿದಿದ್ದು
ಈಗ ಗೊತ್ತಾಗುವ ಸಮಯ.