ಮಡಕೆ

ಕನಸುಗಾತಿ
ಮಡಕೆ ಕೊಂಡಳು
ಅವನು ಹಸುವಿನ ಬಗ್ಗೆ ಮಾತನಾಡಿ ಮುಗಿಸುವಷ್ಟರಲ್ಲಿ
ಇವಳು ಸಂತೆಗೆ ಹೋಗಿ
ಮಡಕೆ ತಂದಾಯಿತು
ಹಾಲಿಗೆ, ಮೊಸರಿಗೆ, ಬೆಣ್ಣೆಗೆ, ತುಪ್ಪಕ್ಕೆ
ಇಷ್ಟಲ್ಲದೆ ಮಿಗುವ ಹಾಲನ್ನು ತುಂಬಿಸಿಡಲಿನ್ನೊಂದು ಮಡಕೆ

ಅರಿವಿದೆಯೆ ನಿನಗೆ
ಕನಸಿನ ಹಸುವಿನ ಮಧುರ ಹಾಲಿಗೆ
ಕಣ್ಣೆತ್ತಿ ನಿಂದವಳೆ
ಕನಸು ಮುಗಿಯುತ್ತದೆ
ಎಚ್ಚರಾದಾಗ
ಹಸು, ಹಾಲು, ಮಾತು, ಮೌನ,
ಬೆಣ್ಣೆ ಮತ್ತು ತುಪ್ಪ
ಯಾವುದೂ ಇರದ
ಬದುಕಿನ ಮಡಿಕೆ
ಬೋರಲು ಬಿದ್ದಿದೆ

ಮಡಕೆಗಳ ಹಸಿಯೊಡಲಿನಲಿ ಬರಿದೆ ಕನಸು.
ತುಂಬಿದರೂ ತುಂಬದಿದ್ದ ಹಾಗೆ
ಅವು ಎಂದಿಗೂ ಖಾಲಿ.

ಥೇಟ್ ಬದುಕಿನ ಹಾಗೆ
ಕನಸೂ ಇದ್ದು ಬಿಟ್ಟರೆ
ಏನು ಮಾಡುವುದು?
ಕೊಳಲನೂದುವ ಗೋವಳ 
ಸುಮ್ಮನಿರುವನು
ಕನಸಿನ ವಾಸ್ತವಕ್ಕೆ ಬೆದರಿ.