ಶಿಲುಬೆ ಹೊತ್ತ ಬೆನ್ನು

ಮೋಡ ಕಟ್ಟುತ್ತದೆ
ಹನಿಯುವುದೇ ಇಲ್ಲ
ಹೇಳಲಿಕ್ಕೆ ತುಂಬ ಇದೆ
ದನಿಯಾಗುವುದೇ ಇಲ್ಲ

ಹೀಗಿರಬಾರದಿತ್ತು
ಹಾಗೇ ಇದ್ದಿದ್ದರೆ ಚೆನ್ನಿತ್ತು

ಈಗ ಏನು ಮಾತಾಡಿದರೂ
ಕರ್ತವ್ಯ ಮತ್ತು ಜವಾಬ್ದಾರಿ
ಶಿಲುಬೆ ಹೊತ್ತ ಬೆನ್ನು
ಕೂಡುವುದಿಲ್ಲ ಕಣ್ಣು
ಮಿಂಚುವುದಿಲ್ಲ
ಬರಿದೆ ಗುಡುಗು
ಮಳೆ ಬರದೆಯೂ
ಕಲಕಿ ಹೋದ ಕಣ್ಣು

ಜೊತೆ ಹೆಜ್ಜೆ,
ಗುರಿಯಿರದ ಹಾದಿ
ಹನಿ ಮುದ್ದಿಸುವ ಕಾನು
ಕಂಡ ಶಿಖರವನೇರಲಿಕ್ಕು
ಕಣಿವೆ ತುಂಬ ದಿಕ್ಕು
ಎಲ್ಲ ದಾಟಿ
ರಾಜಪಥದ ಬೀದಿಯ
ಆರತಕ್ಷತೆಯಲ್ಲಿ
ಬಯಲಾದೆವು

ಹಾಗೇ ಇದ್ದಿದ್ದರೆ ಚೆನ್ನಿತ್ತು.

ಶಿಲುಬೆ ಹೊತ್ತ ಬೆನ್ನು
ಸಾಕೆನಿಸಿಯೂ ಹೊರಲೇಬೇಕಿನ್ನು.