Thursday, December 20, 2012

ಚಂದಿರನ ಪಥ

ಚಂದಿರನ ಪಥ ಬದಲಾಗಿದೆ,
ಹುಣ್ಣಿಮೆಗೆ ಹರಡಿಕೊಂಡು
ಕೂರುತ್ತಿದ್ದ ಅಂಗಳದಲ್ಲೀಗ
ಹೈ ವೋಲ್ಟೇಜು ಬಲ್ಬು ಉರಿಯುತ್ತದೆ,
ಬೆಳದಿಂಗಳು ಖಾಲಿ.
ಒಳ್ಳೊಳ್ಳೆ ಬೆಳಕಿನ ಕವಿತೆಗಳಿವೆ
ರಾತ್ರಿಗೆ ಓದಲು ಮಜ ಬರುತ್ತದೆ
ಇಲ್ಲ ಪುಸ್ತಕಗಳಿಲ್ಲ
ಲ್ಯಾಪ್ ಟಾಪಿನ  ರೀಡರುಗಳಲ್ಲಿ
ಫೇವರಿಟ್ಟುಗಳಾಗಿ ಉಳಿಸಿದ
ಕೊಂಡಿಗಳಲ್ಲಿ
ಜಗದಗಲದ ಜ್ಞಾನ
ಹರಿಯುತ್ತಿರುತ್ತದೆ-
ನಮ್ಮ ಬಾಯಿಗೆ ತಕ್ಕ ಹೀರುಗೊಳವೆ.

ಚಂದಿರನ ಪಥ ಬದಲಾಗಿದೆ,
ಹುಣ್ಣಿಮೆಯ ವಿಳಾಸ ಕಳೆದುಹೋಗಿದೆ.
ಈ ಝಗಮಗ ಜಗತ್ತಲ್ಲಿ
ಕುರುಡು ಕುರುಡಾಗಿ ಹೊತ್ತಿಕೊಳ್ಳುವ
ಹುಣ್ಣಿಮೆಗಿಂತ
ಉರಿವ ಕಣ್ಣಿಗೆ
ಸಮಾಧಾನ ಹೇಳುವ ಕತ್ತಲೆಯೆ ಸೊಗಸಾಗಿದೆ.

ದಿನಚರಿಯಲ್ಲೀಗ ಸಮಯವಿಲ್ಲ
ಸಿಗ್ನಲ್ಲುಗಳ ನಿಭಾಯಿಸಲು ಹೆದರಿ
ಚಂದಿರನ ಪಥ ಬದಲಾಗಿದೆ,
ಕಾಯುತ್ತ ಕುಳಿತವರು
ಹಾದಿಯ ಮರೆಗೆ,
ಸೋತ ಹೆಜ್ಜೆಗಳ ನೆರವಲ್ಲಿ ನಲುಗುತ್ತಾ
ಬೆಳದಿಂಗಳ ದಾರಿ ಸಿಗದಾಗಿದೆ.