Friday, December 20, 2013

ಚಿಂತೆ

ಚಿಂತೆ : -
ಇದ್ದುದಕ್ಕೆ
ಇಲ್ಲದಿರುವುದಕ್ಕೆ
ಬಂದುದಕ್ಕೆ
ಬಾರದಿರುವುದಕ್ಕೆ
ಹಗುರಾಗಿರುವುದಕ್ಕೆ
ಭಾರವಾಗಿ ಉಳಿದಿದ್ದಕ್ಕೆ
ಕಳೆದು ಹೋಗಿದ್ದಕ್ಕೆ
ಬಂದು ಕೂಡಿದ್ದಕ್ಕೆ
ಎತ್ತಿಟ್ಟಿದ್ದಕ್ಕೆ
ಎತ್ತಿಡದೆ ಇದ್ದಿದ್ದಕ್ಕೆ
ಎಲ್ಲದಕ್ಕೂ ಮತ್ತು ಯಾವುದು ಅಲ್ಲವೋ ಅದಕ್ಕೂ
ಬಹುಶಃ
ನಮ್ಮ ಮಿದುಳ ಬಳ್ಳಿಯ ಮೂಲವೇ
ಹೀಗಿರಬಹುದು
ಹೀಗೆಂದೆ ಹಿರಿಯರು
ಕೆಲಸವಿಲ್ಲದ ಬಡಗಿಯ
ಹಲ್ಲಿಲ್ಲದ ಕಡಲೆಯ
ಚಿಂತಾ ಚಿತೆಯ
ಗಾದೆ ಕಟ್ಟಿರಬಹುದು
ಕೆಲವು ಕಟ್ಟದೆ ಬಿಟ್ಟಿರಲೂ ಬಹುದು.
ಬೇಕು ಬೇಕಿದು ಬೇಕು
ಇದು ಬೇಡ ಬೇಡ ಬೇಡವೇ ಬೇಡ.
ಬೇಕಾಗಿದ್ದು ಬೇಡ
ಬೇಡಾಗಿದ್ದು ಬೇಕು..
ನಾವು ನಮ್ಮ ಬಲೆಯಲ್ಲೇ
ಸಿಕ್ಕುಬಿದ್ದ ಅಸಹಜ ಜೇಡ.
ಕತ್ತಿ ಚೂಪಾಗಿಸಿ
ಕಾಡು ಹೊಕ್ಕು
ಮಿಕ ಕಂಡೂ ಸುಮ್ಮನಿರುವ ಬೇಡ.
ಪಕ್ಕದ ಮನೆಯ
ಒಲೆಯಲ್ಲಿ ಬೇಯುತ್ತಿರುವ
ವ್ಯಂಜನದ ಕಂಪಿಗೆ
ಹಳಹಳಿಸುವ ಖೇದ.
ಚಿಂತೆಯ ಬಲೆಗೆ
ಗಪ್ಪಿ, ಗೋಲ್ಡು, ಬಂಗುಡೆ, ಬೂತಾಯಿ, ಶಾರ್ಕು, ತಿಮಿಂಗಿಲ ಎಲ್ಲವೂ
ಒಂದೇ...

ಬೇಲಿಯೊಳಗೆ ಚಡಪಡಿಸುವ ವಿಸ್ತಾರ.

Tuesday, December 17, 2013

ಮರ್ಮರ..

ಅಗೂಲಕೆ ಹರಡಿ
ಅಲ್ಲಲ್ಲಿ ಬಿಳಲಾಗಿ
ಅಂಗಳ ತುಂಬ ನೆರಳಾಗಿ
ಮಣೆ, ಈಳಿಗೆ ಮಣೆ, ಅಡಿಕೆ ಸುಲಿಯುವ ಮಣೆಗಳ
ಹಲಗೆಯಾಗಿ
ಸುಮ್ನೆ ಇಳಿಸಿದ ಕಡಿರಾಡಿನ ರೀಪು ಪಕಾಶಿಯಾಗಿ
ಗಾಳಿ ಬೀಸಿದಾಗೆಲ್ಲ ತುಯ್ದಾಡಿ
ಚಳಿಗಾಲದಲ್ಲಿ ಗುಡಿಸಿದಾಗ ತುಂಬಿದ ಬುಟ್ಟಿಯ ಎಲೆಯಾಗಿ
ದನ ಕರಗಕ್ಕೆ ಕೊಟ್ಟಿಗೆ ಸೊಪ್ಪಾಗಿ
ಸಗಣಿಯೊಡನೆ ಸೇರಿ ಕೊಳೆತು
ತೋಟಕ್ಕೆ ಗನಾ ಗೊಬ್ಬರವಾಗಿ
ರಜೆಗೆ ಬಂದ ಮಕ್ಕಳ
ಆಟಕ್ಕೆ ತೊನೆದು ತೂಗಿದ ಗೆಲ್ಲಾಗಿ
ವಿಸ್ತರವ ಅಳೆಯುವ ಹಕ್ಕಿ ಕುಲಕ್ಕೆ
ಉಣಿಸುವ ಹಣ್ಣಾಗಿ
ಸಂಜೆಗೆ ಮರಳಿದವಕ್ಕೆ
ಗೂಡುಗೂಡಾಗಿ
ಮನೆವಿಸ್ತರಣೆಗೆ ಅಡ್ಡಗಾಲಾಗಿ
ಅಂಗಳಕ್ಕೊಂದು
ಗಡಿಗುರುತಾಗಿ, ಬಯಲಲೆವ ಬೂತಗಳಿಗೆ
ಒಡಲಾಗಿ
ಇರಲೆಬೇಕಾಗಿ
ಒಮ್ಮೊಮ್ಮೆ ಬೇಡಾಗಿ ಅನಿಸಿದ್ದು
ದಶಕಗಟ್ಟಲೆ
ಬೇರೂರಿ ಉಳಿದಿದ್ದು
ನೆಲದ ತೊಟ್ಟಿಲಲ್ಲಿ ಮೊಗವರಳಿ
ಆಕಾಶದ ತೆಕ್ಕೆಯಲ್ಲಿ ಮೊಗಹುದುಗಿಸಿ
ಮಳೆಗೆ ಮೈಯೊಡ್ದಿ
ಗಾಳಿಗೆ ಮೈದೂಗಿ
ಸಂಕ್ರಮಣಗಳನ್ನೆಣಿಸಿದ
ಮರ
ಮೊನ್ನೆ ಸಾಕಾಗಿ ಉರುಳಿತು.
ನಿನ್ನೆ ಫೋನು,ಜೆಸಿಬಿ,ಗರಗಸಗಳ ಸದ್ದು
ಇವತ್ತು ಖಾಲಿ ಅಂಗಳ,

ಬಂದು ಹಾರಿಹೋಗುವ ಹಕ್ಕಿಗಳ ರೆಕ್ಕೆಯ ಸದ್ದು.