Wednesday, March 7, 2012

ಆ ಮೇಲೆ..

ಔಟ್ ಆಫ್ ದಿ ಡೇ ಅಂಡ್ ನೈಟ್, ಅ ಜಾಯ್ ಹ್ಯಾಸ್ ಟೇಕನ್ ಫ್ಲೈಟ್.. - ಪಿ.ಬಿ.ಶೆಲ್ಲಿ

ಮೊಗ್ಗು ಅರಳಿದ ಮೇಲೆ
ಗಂಧ ಗಾಳಿಯ ಪಾಲು
ಮೇಲೆಸೀ ಕಲ್ಲು,
ಬಿದ್ದರೂ ಕೆಳಗೆ ಪರ್ವಾಗಿಲ್ಲ
ಅಂದು ಹಾರಿಸಿಕೊಂಡು
ಗಾಳಿಯಲಿ ತೇಲಿದ
ನಲವಿನ ಬಳ್ಳಿಯೇ
ಈಗ ಬಿದ್ದ ನೋವಿಗೆ
ಯಾಕೆ ಅಳು?
ಕೆಳಗೆ ವಾಪಸಾಗಿದ್ದು ಕಲ್ಲು ಮಾತ್ರ
ಖುಶಿ ಗುರುತ್ವ ಕಳೆದು ಹಾರಿ ಹೋಗಿತ್ತು.
ಕಾಲನ ಹೆಸರು
ಯಾಕೆ ಕಾಲ
ಅಂತ ಗೊತ್ತಾದ ಹೊತ್ತು
ದೀಪದುರಿಯ ಕಣ್ಣಿನ ಒಡಲ
ತುಂಬ ಬಿಳಿ ಬಿಳಿ ಮುತ್ತು.
ಹೂವಾದ ಮೊಗ್ಗು
ಒಣಗಿ ಕುಸುಮಗಳುದುರಿ
ತೊಟ್ಟು ಕಳಚಲೆಷ್ಟು ಹೊತ್ತು!
ಕಿನಾರೆಯ ಮರಳ ಒಡಲು
ಇರುವುದೇ
ನಾವೆ ಹತ್ತಿ - ಇಳಿದು ಬೇರೆಡೆಗೆ ಹೋಗಲು
ಅಲ್ಲವಿದು ಮನೆಯ ಮಾಡಲು
ಕಾಲನ ಹೆಸರು ಯಾಕೆ ಕಾಲ ಅಂತ ಗೊತ್ತಾದ ಹೊತ್ತು..
ಎಂದೂ ಕಾಣದ ಕನಸಿನ ತುಂಬ ಅತ್ತು
ಕಂಪು ಬೀರದ ಕವಿತೆಯ ಹೆತ್ತು
ಕರಗುತಿಹ ಜೀವ ಕಳೆದಲ್ಲೇ ಹುಡುಕಿತ್ತು.
ಆಮೇಲೆ..
ಆಮೇಲಾಮೇಲೆ..
ಕಪ್ಪುನೀಲಿ ಬಾನ ಎದೆಯಲಿ ಬರೀ ಚುಕ್ಕಿ ಚುಕ್ಕಿ ಇತ್ತು.

1 comment:

sunaath said...

ಸಿಂಧು,
ಇಂತಹ ಒಂದು ಕವನವನ್ನು ಓದಿದಾಗ ಎಷ್ಟು ಖುಶಿ ಆಗುತ್ತೆ ಗೊತ್ತಾ? ಇದು ಕಂಪು ತುಂಬಿದ ಕವನ!