Monday, February 13, 2017

ಉನ್ಮತ್ತೆ

ನೀನು ನಗುತ್ತೀಯ-
ಹೂವರಳುತ್ತದೆ.
ತಣ್ಣಗೆ ಸವರುವ ಗಾಳಿಯಲ್ಲಿ
ಕಳೆದ ಕಾಲದ ಅಲರು
ಪರಿಮಳೋನ್ಮತ್ತ ಮನಸು
ಕಾಲ ಕೆಳಗಿನ ನದರು
ಮರೆತು
ಓಡೋಡುವ ಕಾಲ...


ನೀನು ನಗುವುದಿಲ್ಲ-
ಹೂವು ಅರಳುತ್ತಿದೆ
ನೋಡದೆ ಹೋಗುವ ಕಣ್ಣು,
ತಣ್ಣಗೆ ಸವರುವ ಗಾಳಿಯಲ್ಲಿ-
ಒಣಗಿ ಬಿರಿದ ಮೈ ನಡುಗುತ್ತದೆ
ಕಾಲ ಕೆಳಗೇನೂ ಇಲ್ಲದ ನದರು
ಮರೆತು
ನೆನಪುಗಳ ಬನದ ದಾರಿ
ಹುಡುಕುತ್ತ ನಿಲ್ಲುತ್ತೇನೆ-
ಪರಿಮಳವ ಹುಡುಕಿ ಮತ್ತೆ ಮತ್ತೆ.

ಸಿಗ್ನಲ್ಲು ರಿಪೇರಿಗೆ ಬಂದಿದೆ
ಹಸಿರಿಲ್ಲ. ಕೆಂಪು ಆರುವುದಿಲ್ಲ
ಅದೋ ಅಲ್ಲಿದೆ ದಾರಿ
ಭಗ್ನ ಸೇತುವೆಯ ಚೂರುಗಳು
ಚದುರಿ...

ನೀನು ನಗುತ್ತೀಯ-
ಹೂವರಳಿದ ನೆನಪು;
ಕಳೆದ ಕಾಲದ ಅಲರು;
- ತೀಡದೆ ಉನ್ಮತ್ತೆ, ಭ್ರಾಂತೆ..ಅವಿಶ್ರಾಂತೆ,
ಸಾಕಾಗಿದೆ ಹಾಗೆ ಇಲ್ಲಿ ಮಲಗುತ್ತೇನೆ.

ನೀನು ನಗು ಅಥವಾ ಸುಮ್ಮನಿರು
ಎನಗಿಲ್ಲ ಚಿಂತೆ..
ಸೊನ್ನೆ ತೆಗೆದು ಉರಿಸಲು ಕಾಯುತ್ತಿರುವರಂತೆ.

2 comments:

Malini Guru Prasanna said...

ಭಗ್ನ ಸೇತುವೆಯ ಚೂರುಗಳು..

sunaath said...

ಬದುಕಿಗೆ ಬೇಕಾದ ಉನ್ಮತ್ತ ಮಾರ್ಗ!