ರೆಕ್ಕೆಯಿಲ್ಲದ ಗರುಡ

ಈ ತಿಂಗಳಿನ ವಿಷಾದ ರಾಗವೆಲ್ಲಿ?
ಆಷಾಢದ ಕೊನೆಕೊನೆಗೆ ವಿಧುವಡಗಿದಲ್ಲಿ
ಕಣ್ ಬನಿ ತೊಡೆವ ಕತ್ತಲ ಮೂಲೆಯಲ್ಲಿ
ಯಾರೂ ನೋಡದಲ್ಲಿ
ಕಿವಿ ದೂರವಾದಲ್ಲಿ
ತನ್ನಷ್ಟಕೆ ತಾನೆ ಎರಡೆರಡೆ ಹನಿಯಲ್ಲಿ
ಮೀಟುವ ವಿಯೋಗದ ವಿಸ್ತರಣೆಗೆ
ಶೃತಿ ಬೇಕಿಲ್ಲ. ತಬಲ ಸಲ್ಲ.

ಈಗೀಗ
ಕತ್ತಲ ಮೂಲೆ ಸಿಗದೆ
ಬಿಕ್ಕುಗಳ ತೊಡಲು ಸಮಯವಿರದೆ
ಆವರಿಸಿರುವ ಸಂಸಾರ ಸಾರ ಸುಧಾಂಬುಧಿ.
ಕಾಲ ಎಂತ ಹರಿತವನ್ನೂ
ಮೊಂಡಾಗಿಸುತ್ತದೆ.
ಆದರೂ..ಮೊಂಡು ಕತ್ತಿಯ ಗಾಯ
ತುಂಬ ದಿನದ ಮೇಲೆ ಹುಣ್ಣಾಗುತ್ತದೆ.
ಆಷಾಢ ಮುಗಿದ ಶ್ರಾವಣದಲ್ಲಿ
ಹಬ್ಬಸಾಲಿನ ಎಲೆಮರೆಯಲ್ಲಿ
ನಡುಗುವ ಶಿಶಿರ
ಒಳಗೊಳಗೆ ಮೀಟುವ ವಿಹಾಗ
ರೆಕ್ಕೆ ಕತ್ತರಿಸಿ ಬಿದ್ದ ನೆನಪಿನ ವಿಹಗ.

ಮತ್ತೆ ಮತ್ತೆ
ನೋವ ತಿದಿಯೊತ್ತುವುದು ಯಾವುದು
ವಿಯೋಗ ಅಥವಾ ತಪ್ಪಿ ಘಟಿಸಿದ್ದ ಸಂಯೋಗ?
ಇದಕ್ಕಿರಬಹುದೆ ಅಪರಕರ್ಮ?
ಸಂತೈಸಿ ಕಥಿಸುವ ಗರುಡ ಪುರಾಣ?
ಏನು ಕೇಳಿದರೇನು!! ರೆಕ್ಕೆಯಿಲ್ಲದ ಗರುಡ ಹಾರಬಹುದೆಲ್ಲಿಗೆ?