Monday, June 13, 2016

ಇವನಿವಳು

ಇವನಿಗೆ ಗ್ರೀಕ್ ಶಿಲ್ಪ ಕಾಯ
ಇವಳು ತಿಲೋತ್ತಮೆಯ ಪ್ರತಿ
ಅಹ ಇವನು ಮತ್ತೆ ಪಿಟ್, ಡೆಪ್, ಡಿಕಾಪ್ರಿಯೋ, ಕ್ರೂಸು
ಇವಳೋ ಮನ್ರೋನ ತುಂಡು
ಕಂಗನಾ, ಜೂಲಿಯಾ, ನಿಕೋಲಿ, ಜೋಲಿ.

ಗಂಡೆಂದರೆ ಹೀಗೆ ಇಂಚುಗಟ್ಟಲೆ ಎದೆ
ಕಣ್ಣೀರಿಡದೆ, ಹಿಡಿದ ಕೆಲಸ ಬಿಡದೆ
ಪುರುಷಾರ್ಥ ಪೂರೈಕೆ

ಹೆಣ್ಣೆಂದರೆ ಹೀಗೆ ಅಳತೆಗಿಟ್ಟ ಸೌಷ್ಠವ
ತಾಯ್ತನದ ಜೇನು, ದಾಂಪತ್ಯದ ಜೀನು
ಕಣ್ಣ ಕೊಳದಿ ಹೊಳೆವ ಕಪ್ಪು ಮೀನು
ಅರ್ಹತೆಗಳ ಪಟ್ಟಿ, ಮೇಲೆತ್ತಬಾರದ ದಿಟ್ಟಿ
ಕ್ಷಮಯಾ ಧರಿತ್ರೀ.. ಭರಿಸಿ ಭರಿಸಿ ಬೆನ್ನು ನೋಯುತ್ರೀ

ಇವರಿಬ್ಬರ ಮಧ್ಯದ್ದು ಎಲ್ಲಿಗೂ ಸಲ್ಲ, ಒಲ್ಲ
ನಲ್ಲೆಯಾಗಬಾರದ ನಲ್ಲ;
ಸುಕುಮಾರ ಸುಕೋಮಲ ರಾಧೆಯ ಗೊಲ್ಲ-ನ
ತಾಳತಟ್ಟಿ ಪಾಡುವವರಿಗೆ ಇವರೆಂದರೆ ಇಷ್ಟವಿಲ್ಲ

ಹೊತ್ತ ಧರೆಯ ಸಂಕಟ ನೋಡಲಾಗದೆ
ಸಂಕರಕೆ ನೂಕಿರುವ ನಿಸರ್ಗನಿಯಮಕ್ಕೆ
ಮೊಗದಿರುವುವ ಅಳತೆಗೋಲಿನ ಜನಮಾನಸ
ಒಳಗಿನ ಅಂತಃಕರಣದ ಕರೆಗೆ ಕಿವುಡು
ಜೀವಪರ ಒಸಗೆಯೆಂದರೆ ಕುರುಡು.

ಕಗ್ಗೊಲೆಗೆ
ಎಂದಿನಂತೆ
ಗ್ರಂಥದ ಪುರಾವೆ, ಧರ್ಮದಮಲು

ಹೊರಗೆ ಬೈದುಕೊಂಡು, ಒಳಗೊಳಗೇ
ಸರಿಯಾಯ್ತು ನನ್ ಮಕ್ಳಿಗೆ..
ಎಂದು ನಿಸೂರಾಗುವ
ಪೊಲಿಟಿಕಲೀ ಕರೆಕ್ಟ್ ಮರುಳು.


ಈ ಪರಿಯ ಕಂಡು ಮಂಕಾದ ಹಗಲು.

1 comment:

sunaath said...

ಇದು ನಿಸರ್ಗಧರ್ಮ,
ಪೂರಾ ಅಧರ್ಮ.